பிற்கால அறஇலக்கியங்களில் குற்றவியல் சிந்தனைகளும் சமூக நீதி நிர்வாகமும்: Concepts of Criminal Justice and the Administration of Social Justice in Later Didactic Literature

சுருக்கம்

மனிதன் வாழக்கூடிய சமுதாயத்தின் ஒழுங்கிற்கும் அமைதியான வாழ்வியல் சூழலுக்கும் அடிப்படையாக விளங்குபவை அறச் சிந்தனைகளே. தமிழ் இலக்கியப் பரப்பில் சங்க காலம் மற்றும் சங்கம் மருவிய காலத்தைத் தொடர்ந்து, பிற்காலத்திலும் குறிப்பாக 14-ஆம் நூற்றாண்டு முதல் 19-ஆம் நூற்றாண்டு வரையிலான காலகட்டத்தில் பல நீதி நூல்கள் தோன்றின. அவை சமூகத்தின் ஒழுங்கிற்கும் அமைதியான வாழ்வியலுக்கும் தேவையான நெறிமுறைகளை வழங்கின. பிற்கால அற இலக்கியங்களான நீதிநெறி விளக்கம், நன்னெறி, அறநெறிச்சாரம், மாயூரம் வேதநாயக பிள்ளையின் நீதிநூல் போன்றவை தனிமனித ஒழுக்கத்தை வலியுறுத்துவதோடு, சமூகம் என்ற அமைப்பில் குற்றத் தடுப்பு, குற்றங்களுக்கான தண்டனைக் கோட்பாடுகள், நீதி நிர்வாகம் ஆகியவற்றையும் நுட்பமாக விளக்குகின்றன. பிற்கால அறஇலக்கியங்களில் பொதிந்துள்ள குற்றவியல் சிந்தனைகளையும் சமூக நீதி நிர்வாக முறைகளையும் பன்முகப் பார்வையில் ஆய்வதே இக்கட்டுரையின் முதன்மை நோக்கமாகிறது..

பிற்கால அற இலக்கியங்கள் தனிமனித ஒழுக்கத்தை போதிப்பதோடு நின்றவிடாமல், சமூகத்தில் நடக்கும் குற்றங்கள், அதற்கான காரணங்கள், அதைத் தடுக்கும் வழிமுறைகள், நடுவு நிலைமை, நீதி நிர்வாகம் மற்றும் தண்டனைக் கோட்பாடுகள் போன்றவற்றையும் ஆராய்ந்துள்ளன. பிற்கால அறநூல்களின் துணைகொண்டு, 1.குற்றவியல் மற்றும் குற்றங்களைத் தடுப்பதற்கான சிந்தனைகளை அடையாளம் காணுதல் 2. சமூக நீதி, நிர்வாகம் மற்றும் நடுவுநிலைமையைப் பின்பற்றும் நெறிகள் எவ்வாறு வலியுறுத்தப்பட்டுள்ளன என்பதை ஆராய்தல், 3. பிற்கால அறச் சிந்தனைகளைச் சமகாலச் சூழலோடு ஒப்பிட்டுப் பன்முகப் பார்வையில் விளக்குதல் என்ற நிலைகளில் இவ்வாய்வுக்கட்டுரை அமைகிறது.