சேனைப் பயிர்ச்செய்கையும் நிலவளம் தொடர்பான சவால்களும்

ம.ஜனனி மற்றும் ச. தவப்பிரபா புவியியல் துறை, கிழக்குப்பல்கலைக்கழகம், இலங்கை mjanani74@gmail.com and thavaprabas@esn.ac.lk

Abstract

சேனைப்பயிர்ச்செய்கை வாழ்வாதார தொழிலாக காணப்படுவதோடு அதிக வருவாயையும் ஈட்டிதருகின்ற தொழிலாகவும் தற்காலத்தில் மாறி வருகின்றது.  இலங்கையின் மட்டக்களப்பு மாவட்டத்தில் ஏறாவூர்ப்பற்று பிரதேசசெயலாளர் பிரிவில் சேனைப் பயிர்ச்செய்கையானது அதிகளவில் மேற்கொள்ளப்பட்டு வருகின்றது. இப் பிரதேசசெயலாளர் பிரிவில் சேனைப் பயிர்ச்செய்கை மேற்கொள்ளும் நிலங்கள் வளம் தொடர்பாக எதிர்கொள்ளும்  சவால்களை ஆராய்தலினை அடிப்படை நோக்கமாகக்  கொண்டு முதலாம் மற்றும் இரண்டாம் நிலை தரவுகளைப் பயன்படுத்தி இவ்வாய்வு மேற்கொள்ளப்பட்டுள்ளது. இதற்காக ஏறாவூர்ப்பற்று பிரிவிலிருந்து சேனைப்பயிர்ச்செய்கையில் ஈடுபடும் ஐந்து பிரதேசங்களிலிருந்து மொத்த குடும்பங்களில் 12 சதவீதமானவர்களுக்கு என்ற அடிப்படையில் 100 வினாக்கொத்துக்கள் வழங்கப்பட்டு தரவுகளும் தகவல்களும் பெறப்பட்டன. இதனை விட கலந்துரையாடல், நேரடி அவதானிப்பு மூலமும் தகவல்கள்; பெறப்பட்டன. மேலும் இரண்டாம் நிலைத்தரவுகளும் பெறப்பட்டு அளவு ரீதியாவும் பண்பு ரீதியாகவும் ஆய்வில் விளக்கப்பட்டுள்ளன. இவ்வாய்வில் சேனைப்பயிர்ச்செய்கையினை தொடர்ச்சியாக மேற்கொள்ளும் போது மண்தரமிழப்பு ஏற்படுகின்றதா என்பதனை கண்டறிவதற்காக ஆய்வுகூடப்பரிசோதனைகளும் மேற்கொள்ளப்பட்டுள்ளன. காடுகளை அழித்து முதலாம், இரண்டாம், மூன்றாம், நான்காம் தடவை சேனைப்பயிர்ச்செய்கை மேற்கொள்ளும் இடங்களில் இருந்து 20 மண் மாதிரிகள் சேகரிக்கப்பட்டு மண்ணின் pH, மின்கடத்து திறன், நைட்ரஜன், பொசுபரசு, பொட்டாசியம் ஆகியவை ஆய்வுக்குட்படுத்தப்பட்டன. மண்பரிசோதனைக்கூடாக தொடர்ச்சியாக சேனைப்பயிர்ச்செய்கை செய்யும் போது மண்ணின் வளம் குறைவடைவதினை உறுதிபடுத்தக்கூடியதாக இருந்தது. ஆய்வுப்பிரதேசத்தில் 64 சதவீதமானோர் அசேதனப் பசளையினையும் 36 சதவீதமானோர் சேதனப்பசளையினையும் பயன்படுத்தி சேனை உற்பத்தியினை மேற்கொள்வதை அறிய முடிந்தது. அத்துடன் சேனைப்பயிர்ச்செய்கை மேற்கொள்ளும் நிலங்களில் வளம் தொடர்பான சவால்களும் இனங்காணப்பட்டு அதற்கான தீர்வுகளும் இவ்வாய்வில் முன்வைக்கப்பட்டுள்ளது.