ஒரு கட்டுரையை வாசகர்களும் மதிப்பாய்வாளர்களும் தரவுத்தளங்களும் முதலில் அறிவது அதன் ஆய்வுச் சுருக்கத்தின் (Abstract) வழியாகத்தான். களஞ்சியம் இதழ், ஒவ்வொரு கட்டுரைக்கும் தமிழிலும் ஆங்கிலத்திலும் 150–250 சொற்களில் சுருக்கம் கேட்கிறது. அதை எவ்வாறு எழுதுவது என்பதை இப்பக்கம் விளக்குகிறது.
சுருக்கத்தின் நான்கு பகுதிகள்
- நோக்கம்: இக்கட்டுரை எந்தக் கேள்விக்கு விடை தேடுகிறது? (1–2 வாக்கியங்கள்)
- மூலங்களும் ஆய்வுமுறையும்: எந்த நூல்கள், எந்தப் பதிப்பு, எந்த அணுகுமுறை – பகுப்பாய்வு, ஒப்பீடு, களஆய்வு? (1–2 வாக்கியங்கள்)
- முதன்மைக் கண்டறிதல்கள்: ஆய்வில் என்ன கண்டறியப்பட்டது? (2–3 வாக்கியங்கள்)
- நிறைவு: இக்கண்டறிதலின் முக்கியத்துவம் என்ன? (1 வாக்கியம்)
எடுத்துக்காட்டு (சுருக்கமாக)
“புறநானூற்றில் ஈகை பற்றிய பாடல்களில் அரசன்–புலவன் உறவு எவ்வாறு சித்திரிக்கப்படுகிறது என்பதை இக்கட்டுரை ஆராய்கிறது. உ.வே.சா. பதிப்பை அடிப்படையாகக் கொண்டு, ஈகையைப் பாடும் பாடல்களைத் தொகுத்து, அவற்றின் கூற்று, துறை ஆகியவற்றின் அடிப்படையில் பகுப்பாய்வு செய்கிறது. … இவ்வுறவு கொடை–புகழ் என்ற பரிமாற்றமாக மட்டுமின்றி, அறம் சார்ந்த அறிவுரையாகவும் அமைந்துள்ளது என்பதை ஆய்வு காட்டுகிறது.”
தவிர்க்க வேண்டியவை
- முன்னுரையை அப்படியே சுருக்கமாகத் தருவது.
- “இக்கட்டுரையில் பல செய்திகள் ஆராயப்படுகின்றன” போன்ற பொதுவான வாக்கியங்கள்.
- மேற்கோள்கள், அடிக்குறிப்புகள், சுருக்கக் குறியீடுகள்.
- கட்டுரையில் இல்லாத முடிவுகளைச் சுருக்கத்தில் கூறுவது.
ஆங்கிலச் சுருக்கம்
ஆங்கிலச் சுருக்கம் தமிழ்ச் சுருக்கத்தின் சொல்லுக்குச் சொல் மொழிபெயர்ப்பாக இருக்க வேண்டியதில்லை; அதே நான்கு பகுதிகளைத் தெளிவான ஆங்கிலத்தில் தர வேண்டும். தமிழ்ச் சொற்களை ஒரே சீரான ஒலிபெயர்ப்பு முறையில் (எ.கா. ISO 15919) தாருங்கள். இயந்திர மொழிபெயர்ப்பைப் பயன்படுத்தினால் கவனமாகச் சரிபாருங்கள் – பன்னாட்டுத் தரவுத்தளங்களில் உங்கள் கட்டுரையைக் கண்டடைய உதவுவது இந்த ஆங்கிலச் சுருக்கமே.
திறவுச் சொற்கள்
3–5 திறவுச் சொற்களைத் தமிழிலும் ஆங்கிலத்திலும் தாருங்கள். தலைப்பில் ஏற்கெனவே உள்ள சொற்களைத் திரும்பத் தராமல், வாசகர் தேடக்கூடிய சொற்களைத் தேர்ந்தெடுங்கள் (எ.கா. நூற்பெயர், கோட்பாடு, காலம்).